Plantun de Prouvènço

Pèr coumpara dos planto d'encò nostre

Polypodium interjectum & Pinguicula vulgaris

Polypodium interjectum

Polypodiaceae

Nom en français : Polypode intermédiaire.

Descripcioun :
Aqueste poulipòdi-mejansié trachis dins li roucas séusous souto li bos o dins li gaudre, valènt à dire dins de relarg umide. Se dis mejansié pèr-ço-qu'es un pau entre Polypodium cambricum e Polypodium vulgare. Pamens fai de foundo mai grando e toujour dous cop mai longo que larjo. Après, au contro de P. cambricum, a de soro sènso péu (parafiso). Pèr la bèn destria fau regarda lis espourange au microuscope (x 100) pèr verifia que i'ague pas mai de 10 celulo à l'assiso mecanico.

Usanço :
Couneissèn pas d'usanço particuliero pèr aquelo planto. Fabrico d'acide filicinico ço que ié douno uno óudour de champignoun. Escriéure au site se n'en sabès mai.

Port : Pichoto planto lignouso
Taio : 15 à 30 cm
Fueio : Foundo
Tipe bioulougico : Emicriptoufite
Cicle bioulougico : Planto renadivo

Gènre : Polypodium
Famiho : Polypodiaceae

Ordre : Polypodiales

Coulour de la flour : Ges de flour
Petalo : ges
Ø (o loungour) flour : Ges de flour
Flourido : Autouno - Ivèr

Sòu : Si
Autour basso e auto : 0 à 1700 m
Aparado : Noun
Setèmbre à mars

Liò : Roucas - Gaudre
Estànci : Mesoumediterran à Mountagnard
Couroulougi : Éurasiatico
Ref. sc. : Polypodium interjectum Shivas, 1961

Erbo-grasso

Pinguicula vulgaris

Lentibulariaceae

Noms en français : Grassette commune, Langue-d'oie.

Descripcioun :
L'erbo-grasso trachis en mountagno, sus cauquié, dins li riéusset e àutri relarg bagna. Es uno planto carnivoro que pòu aganta de bestiouno emé si fueio pegouso à bord envertouia. Se destrìo de si cousino, mens coumuno, que si flour soun plato emé uno taco blanco sus li petalo que li bord soun pas gaire net.

Usanço :
Li fueio soun couneigudo pèr caia lou la, parié qu'en Suèdo se n'en servien. S'adoubo un sirop purgatiéu que sèrt peréu pèr gari contro lis escarto de pèu. Aro s'atrobo en fitouterapìo pèr sougna lou tussi (espetouranto), li mau de garganto e apasima li nèrvi. S'adoubo en tisano, 20 g de fueio emé de mèu e de jus de limoun. Pamens la planto èi proutejido dins d'ùni relarg.